Spariskógardagur - myndir

Frábær Spariskógardagur Skógræktarfélagsins að baki Þúsundir heimsóttu Kjarnaskóg í gær. Fólkið skemmti sér í skóginum, skógurinn skemmti fólkinu, skemmtikraftarnir, skógurinn og gestir skemmtu sér saman, uppskriftin að fjölskylduhátíðinni er fundin!

Yndi er ein af fjölmörgum verðmætum skógarafurðum. Þetta getum við þegar mismunandi samfélagskraftar eru leiddir saman og jú, þegar starfsfólk Skógræktarfélagsins leit haukfránum augum yfir vettvang í lok dags sást vart ein kókómjólkurferna sem ekki hafði skilað sér í flokkunartunnur.

Takk unga fólk sem heimsótti okkur. Takk öll hin sem heimsóttuð skóginn og lögðuð ykkar af mörkum til að gera daginn dásamlegan. Takk Akureyrarbær fyrir velvilja gagnvart starfsemi okkar!

Sérstakar þakkir fær þó Sérsveitin okkar, starfsfólk og velunnarar, sem reyndar handtók Engan, en í sjálfboðavinnu framreiddi skógarkaffi, popp og ís, úrvals handspilaða músík, fræðslu um sveppi, ber og aðra fæðu úr skóginum, fornbíla, leyfði börnunum á öllum aldri að skjóta af boga og fleira og fleira.  Svo kynnti fyrirtækið Skógarmenn vörur úr skóginum sem það framleiðir. Það er gott að eiga góða að.

Hér að neðan birtum við myndir frá gærdeginum og vel má vera að við bætum við myndum. Hér má sjá stutt drónamyndband.

Kjarnaskógur-Alltaf logn!

Sigurður stjórnarmaður og Sigurður starfsmaður eru kampakátir á góðum degi. Mynd: Ingólfur Jóhannsson.

Tvær myndir af bogfimisvæðinu. Myndir: Ingólfur Jóhannsson og Sig.A.

Ingólfur Jóhannsson fékk engu um það ráðið að við birtum þetta skjáskot úr fréttatíma RÚV. Hann bar hitann og þungann af skipulagningu dagsins. Fyrir hönd félagsmanna og gesta segjum við: Takk, Ingi.

Horft úr lofti á Birkivöll sem var aðalsamkomustaður dagsins. Myndir: Sig.A.

Birkibandið skemmti gestum. Við hljómborðið er framkvæmdastjóri félagsins. Fyrir framan hann eru tvær góðar söngkonur. Önnur þeirra mjög ung. Hún vakti mikla athygli. Til vinstri á myndinni situr Guðríður Gyða Eyjólfsdóttir, fyrrum stjórnarmaður, og kynnir sveppi úr skóginum. Á næsta borði var formaður félagsins, Helgi Þórsson, að kynna matarskóginn. Mynd: Sig.A.

Söngkonan Ragnheiður Júlíusdóttir og trommarinn Árni Ketill Friðriksson stóðu sig með mikilli prýði með Birkibandinu. Við vekjum athygli á að Árni Ketill klæðir sig í stíl við settið. Mættu aðrir trymblar taka það sér til fyrirmyndar. Mynd: Ingólfur Jóhannsson.

Leiksvæðið á Birkivelli var vel nýtt. Mynd: Sig.A.

Formaður félagsins, Helgi Þórsson (til vinstri) kynnti matarskóginn með bragðgóðum sýnidæmum. Í næstu viku munum við birta pistil um hafþyrniber sem eru þarna á borðinu. Mynd: Ingólfur Jóhannesson.

Sama má segja um ærslabelginn góða. Mynd: Sig.A.

Tvær myndir af fornbílasýningunni. Myndir: Sig.A. og Ingólfur Jóhannsson.

Mikið fjölmenni var á Birkivelli og allir stóðu sig með prýði. Neðst má sjá ísröðina. Þar voru allir svalir. Mynd: Sig.A.

Hér má sjá Metis og Brad, starfsmenn Skógarmanna, stillt sér upp til að kynna vörur úr skóginum. Þeir hafa reynst félaginu vel og eru alltaf boðnir og búnir til að aðstoða okkur þegar á þarf að halda. Mikilvægt að skipta nafni Skógarmanna rétt á milli lína ef þarf. Þetta hefur ekkert með skó-garma að gera. Mynd: Ingólfur Jóhannesson.

Skógurinn tók vel á móti öllum. Sjá má að birkið er illa þjakað af birkikembu sem étur blöðin innan frá. Mynd: Sig.A.

Svipað sjónarhorn. Sjá má völundarhúsið og einnig sést í strandblakvöllinn. Mynd: Sig.A.

Poppararnir voru vinsælir. Fyrri myndin sýnir hvar poppað var yfir eldi. Að vanda vakti aðferðin mikla athygli. Seinni myndin sýnir hvar poppið er afhent í heppilegum kaffifilterum. Myndir: Sig.A. og Ingólfur Jóhannsson.

Skjáskot úr fréttum RÚV af viðburðum helgarinnar. Þarna má sjá helstu popparana í skóginum. Lengst til hægri er Alfa Jóhannsdóttir, stjórnarkona en lensuvíðirinn, Salix lasiandra, skyggir á hina popparana. Það eru Heidi Zipro sem er til vinstri og í miðið er stjórnarmaðurinn Ísak Már.

Fjölmargir velvildarmenn félagsins lögðust á eitt með að gera daginn sem ángæjulegastan. Ekki er laust við að sumir hafi verið fegnir hvíldinni. Það á þó ekki við um börnin sem róluðu sér eins og vindurinn. Á timbrinu sitja Jósavin Arason og Eygló Jóhannesdóttir. Mynd: Ingólfur Jóhannesson.

Vel má vera að við birtum fleiri myndir á næstu dögum. Ingólfur Jóhannesson Sigurður Arnarson