Askbrum

Eins og lesendum þessarar síðu er eflaust vel kunnugt höfum við hjá Skógræktarfélaginu birt umfjöllun um tré vikunnar á sumrin og fram á haust. Þessi skrif hafa að mestu legið niðri á veturna en þó ekki alveg. Í upphafi nýs árs þykir okkur við hæfi að endurvekja þennan þátt með örlítið breyttu sniði frá því sem við gerum á sumrin. Við ætlum að birta myndir af trjám í vetrarbúningi ásamt upplýsingum um hvernig greina má þau til tegunda á veturna þegar þau hafa kastað sumarskrúða sínum. Eins og áður munu bæði tré og runnar koma til greina, þótt strangt til tekið flokkist runnar ekki endilega sem tré. Í hverri viku (a.m.k. eitthvað fram á þorrann) munum við birta upplýsingar um eina tegund, algenga eða óalgenga, í ræktun hér á landi, og hvernig þekkja má hana frá öðrum tegundum í vetrarbúningi. Þetta er auðvitað misjafnlega auðvelt. Að jafnaði er auðveldara að greina í sundur sígrænar tegundir en þær sem fella laufin, en kastljósinu verður einkum beint að þeim síðartöldu. Í framhaldinu munum við birta hinn og þennan fróðleik eins og vanalega.


Fyrsta @trévikunnarSE árið 2021 er askur í vetrarbúningi. Á sumrin er hann auðþekktur á fingruðum laufblöðum sínum en þau sjást ekki á vetrum. Seinni part sumars myndar askurinn brum, rétt eins og önnur tré, sem opnast á sumri komanda. Þessi brum asksins eru fremur smá og græn til að byrja með en verða alveg svört þegar þau ná fullum þroska. Ef askurinn tekur á móti vetrinum enn með græn brum er næsta víst að hann kelur. Ef þau eru orðin svört en lítil sem engin hætta á því. Að auki hefur askurinn ljósan og nokkuð sléttan börk sem hjálpar til við greininguna. Það á að vísu aðeins við um ung tré en gömul asktré með margsprungin börk eru óalgeng hér fyrir norðan.


Myndirnar sem fylgja eru teknar í dag í garði í Síðuhverfi. Þær sýna ungan ask með svört, stutt brum og ljósan, sléttan börk. Önnur tré geta haft dökk brum en ekki svona stutt og kolsvört.


2 views

Recent Posts

See All