Rauðgreni
Picea abies

Rauðgreni er langalgengast íslenskra jólatrjá og í huga margra er það hið eina sanna jólatré. Rauðgreni er fíngert og formfallegt tré sem ilmar vel. S.E. heggur nokkuð af rauðgreni í eigin skógum og kaupir einnig tré frá öðrum aðilum, m.a. Skógræktarfélagi Íslands. Það er útbreiddur misskilninur að rauðgreni sé erfitt í notkun sem jólatré vegna barrfellis. Með réttri meðhöndlun má auka barrheldni grenitrjáa verulega.



Blágreni
Picea engelmannii

Blágreni hefur notið vaxandi vinsælda sem jólatré hin síðari ár. Ástæðurnar eru einkum þær að blágreni er oft afar fallegt og eins hitt að það er mun barrheldnara en rauðgreni.
S.E. sækir allt blágreni sem það hefur til sölu í eigin skóga en framboð er mun minna en eftirspurn. Því er ráðlegt fyrir unnendur blágrenis að vera snemma á ferð í jólatrjáasöluna.



Stafafura
Pinus contorta

Stafafura hefur sótt í sig veðrið sem jólatré á undanförnum áratugum. Furan hefur allt annað vaxtarlag en genitrén, mun grófgerðari með löngum nálum og stórgerðum greinum. Stafafura hefur marga kosti sem jólatré og er fyrst að nefna ilminn. Þá er barrfellir ekki vandamál á furutrjám, segja má að þau felli ekki barr. Sérstök meðhöndlun er því óþörf á furu til að hún haldi barri. Oft eru könglar á furutrjánum. Oll furutré sem S.E. hefur til sölu eru sótt í skóga félagsins.


Fjallaþinur
Abies lasiocarpa

Fjallaþinur er því miður afar fágætur sem jólatré á Íslandi. Er það vegna þess að hann þrífst ekki vel nema við bestu skilyrði og ekki hefur verið gróðursett mikið af honum í áranna rás. Hins vegar er fjallaþinur kjörið jólatré og hefur allt til brunns að bera sem slíkt: formfegurð, ilman og barrheldni. Aðeins örfá hundruð fjallaþinstrjáa eru til sölu á landinu öllu fyrir hver jól.


Norðmannsþinur
Abies nordmanniana

Verulegur hluti jólatrjá í híbýlum Íslendinga er fluttur inn frá Danmörk og er norðmannsþinur þar ríkjandi. Þessi tré eru ræktuð á feikimiklum jólatrjáaökrum á Jótlandi og seld víðs vegar um Evrópu. Norðmannsþinurinn hefur þá kosti að fella ekki barr og ilma vel auk þess að vera fallega dökkgrænn á lit. Vegna þess hve hratt trén vaxa eru þau oft nokkuð gisin ofantil. Líkt og með furu þarf ekki neina meðhöndlun á þintrjám til að tryggja barrheldni þeirra.