Landeigandi: Skógræktarfélag Eyfirðinga
Umsjón: Skógræktarfélag Eyfirðinga
Stærð: 12 ha
Friðað: 1946
Hæsta tré 2000: Alaskaösp, gróðursett um 1950, um 10 m


Upphafsmaður skógræktar á Hánefsstöðum var eldhuginn og athafnamaðurinn Eiríkur Hjartarson rafmagnsverkfræðingur, sem keypti jörðina og hóf þar skógrækt 1946.
eiríkur, sem einnig er upphafsmaður Grasagarðsins í Laugardal í Reykjavík, var fæddur og uppalinn í Svarfaðardal og átti þar sterkar rætur þótt hann settist að í Reykjavík.

Skógræktina á Hánefsstöðum hóf hann með því að reisa mikla girðingu um reitinn og var svo vandað til þess verks að nú, meira en hálfrii öld síðar, er sú girðing í fullu gildi.

Næsta áratuginn eða svo flutti Eiríkur með sér frá Reykjavík plöntur sem hann og fjölskylda hans gróðursettu á Hánefsstöðum og kennir þar ýmissa grasa. Alls var í hans tíð plantað 94.633 plöntum í þessa 12 ha. lands.

Nyrst í skóginum útbjó Eiíkur litla tjörn sem er mjög til prýði.

Árið 1965 ánafnaði Eiríkur Skógræktarfélagi Eyfirðinga skóginum og tók félagið þá við umhirðu hans. Eiríkur féll frá 1981 og árið 1986, á 40 ára afmæli reitsins, reisti fjölskyldan honum minnisvarða sem sjá má á mynd hér til hægri.

Skógræktarfélagið átti jörðina fram yfir 1980 að hún var seld að undanskildum skóginum.

Hánefsstaðaskógur hefur í síauknum mæli laðað til sín fólk, enda frábært útivistarsvæði, fjölbreytt og fallegt í tignarlegu umhverfi.

Árið 1999 var undirritaður samningur milli S.E. og Dalvíkurbyggðar um að Hánefsstaðaskógur yrði útivistarsvæði Dalvíkurbyggðar og hófst þar með nýr kafli í sögu þessa merka skógar.
Skógræktarfélagið annast skipulag og yfirumsjón framkvæmda en Dalvíkurbyggð greiðir kostnað við þær og leggur til vinnuafl.

Nú þegar hafa verið lagðir göngustígar og reist leiktæki í skóginum. Þá hafa fjölmargar trjátegundir verið merktar meðfram göngustígum og unnið er að frágangi á grillaðstöðu á samkomusvæðinu.

Allir sem leið eiga um Svarfaðardal eru hvattir til að gefa sér tíma til að ganga um skóginn á Hánefsstöðum.